Sigurður tók lokapróf með láði (Diplomprüfung mit Auszeichnung) í klarínettuleik frá Hochschule für Musik und Darstellende Kunst í Vínarborg 1971.

Hann var klarínettuleikari í Sinfóníuhljómsveit Íslands 1973–2012. Hann hefur kennt við Tónlistarskólann í Reykjavík frá 1977 og við ýmsa tónlistarskóla frá 1973. Hann var skólastjóri Tónlistarskóla FÍH 1980-1988. Hann hefur verið mjög virkur í íslensku tónlistarlífi sem einleikari og í kammertónlist. Sigurður hefur margsinnis leikið einleik með Sinfóníuhljómsveit Íslands og Íslensku hljómsveitinni heima og erlendis og farið í tónleikaferðir um Evrópulönd og Bandaríkin. Þá hefur hann leikið kammertónlist með ýmsum tónlistarhópum og iðkað vínartónlist með eigin salonhljómsveitum í dans- og tónleikasölum. Hann hefur tekið þátt í óperu- og óperettusýningum Þjóðleikhússins frá 1973 og Íslensku Óperunnar frá stofnun hennar.

Sigurður var formaður starfsmannafélags Sinfóníuhljómsveitar Íslands 1974-1975 og varaformaður Félags íslenskra hljómlistarmanna 1976-1980. Hann er stofnandi Salonsveitarinnar Salon Islandus og einn af stofnendum Íslensku hljómsveitarinnar. Hann hefur gert fjöldann allan af umritunum og útsetningum einkum fyrir blásara og salonhljómsveitir.

Hann hefur leikið inn á fjölda hljómdiska, þ.á.m.: Ný tónlist fyrir klarínettu með Sinfóníuhljómsveit Íslands og Önnu Guðnýju Guðmundsdóttur 1987 (eigin útgáfa). Klarínettukonsert eftir Pál P. Pálsson með Sinfóníuhljómsveit Íslands og Petri Sakari hjá Lotus Records 1996 (Ljáðu mér vængi). Áfangar, Íslensk klarínettuverk hjá Smekkleysu 2004 (eigin útgáfa). Andleg verk með Sigrúnu Hjálmtýsdóttur og blásarasextett (Diddú og drengirnir) hjá Tólf tónum 2004 (Ave María) og Lög Vestur-Íslendinga 2011 með sama hópi. Íslands minni, Jónasarlög Atla Heimis Sveinssonar 2007 (eigin útgáfa) Kammertónlist á fjölmörgum plötum og hljómdiskum með hinum ýmsu hópum m.a. Kammersveit Reykjavíkur.

1971 hlaut Sigurður verðlaun frá ráðherra vísinda og rannsókna (Bundesminister für Wissenschaft und Forschung) í Austurríki fyrir framúrskarandi námsárangur við Tónlistarháskólann í Vínarborg. Hann er heiðursfélagi Félags Íslenskra Hljómlistarmanna. Hann hefur hlotið starfslaun listamanna í nokkur skipti.

Sigurður er deildarstjóri blásaradeildar Tónlistarskólans í Reykjavík.

 

Netfang: sis@simnet.is
Símanúmer: 566 7581 / 899 5223

Til baka í kennarayfirlit