Kjartan lauk blásarakennaraprófi og einleikaraprófi á klarínettu vorið 1976 við Tónlistarskólann í Reykjavík. Hann stundaði framhaldsnám við Hochschule für Musik und darstellende Kunst í Vínarborg, Austurríki frá 1976 og lauk þaðan prófi í klarínettuleik vorið 1981.

Kjartan var fastráðinn klarínettuleikari við Sinfóníuhljómsveit Íslands frá 1982-2004. Hann var stjórnandi Lúðrasveitarinnar Svans frá 1982-87; félagi í Haydn-félaginu, Chalumeaux tríóinu og kammer-tónlistarhópnum Octo; stofnaði Blásarasveit Reykjavíkur 1999 ásamt Tryggva M. Baldvinssyni; hefur stjórnað Sinfóníuhljómsveit Íslands, Lúðrasveit Æskunnar, málmblásarasveitinni Serpent og fleiri slíkum hópum.

Frá hausti 1982 hefur hann tekið þátt í allflestum uppfærslum Íslensku óperunnar og auk þess leikið í hljómsveitum í Þjóðleikhúsinu og Borgarleikhúsinu. Hann hefur einnig verið þáttagerðarmaður hjá RÚV. Hann sat í stjórn Musica Nova 1982-84; í verkefnavalsnefnd SÍ; í samninganefndum FÍH við Þjóðleihúsið og SÍ; í stjórn einleikaradeildar FÍH. Hann var formaður ritnefndar FÍH vegna Tónlistarmannatals og í Listráði Íslensku óperunnar frá hausti 2002.

Kjartan var kennari við Royndarmúsíkskúlan og stjórnandi lúðrasveitarinnar GHM í Þórshöfn í Færeyjum 1981-82. Hann var kennari við Tónmenntaskóla Reykjavíkur 1982-84 og Tónlistarskóla Kópavogs 1982-1992. Hann hefur verið kennari við Tónlistarskólann í Reykjavík frá 1985. Hann var deildarstjóri blásarakennaradeildar skólans síðustu árin sem hún starfaði og stjórnandi blásarasveitar og hljómsveitar skólans um árabil.

Kjartan tók við stöðu skólastjóra Tónlistarskólans í Reykjavík haustið 2003.

Netfang: kjartan@menton.is
Símanúmer:

Til baka í kennarayfirlit