Anna Guðný brautskráðist frá Tónlistarskólanum í Reykjavík árið 1979 þar sem kennarar hennar voru Hermína S. Kristjánsson, Jón Nordal og Margrét Eiríksdóttir, en þangað kom hún úr Barnamúsíkskólanum þar sem Stefán Edelstein var kennari hennar. Hún stundaði Post Graduate-nám við Guildhall School of Music í Lundúnum með sérstaka áherslu á kammertónlist og meðleik.

Hún hefur síðan starfað á Íslandi við margvísleg störf píanistans, í kammertónlist, meðleik og sem einleikari.  Hún kemur reglulega fram á Listahátíð í Reykjavík, svo og innan Tíbrár tónleikaraðarinnar í Salnum í Kópavogi.  Hún er píanóleikari Kammersveitar Reykjavíkur, hefur ferðast víða með henni og leikið inn á geisladiska, meðal annars píanókonserta eftir Leif Þórarinsson, Atla Heimi Sveinsson og Þorkel Sigurbjörnsson, en alls hefur hún leikið inn á um 30 diska með ýmsum listamönnum. Samstarf hennar og Sigrúnar Hjálmtýsdóttur, sópransöngkonu hefur staðið síðan á námsárunum í London.  Anna Guðný hefur auk þess leikið með Karlakór Reykjavíkur á vortónleikum þeirra í yfir 20 ár og leikur með hljómsveitinni Salon Islandus. Fyrstu hljómsveitarreynsluna hlaut hún í Íslensku hljómsveitinni sem starfaði í um áratug frá 1983. Anna Guðný hefur komið fram á Reykjavík Midsummer Music hátíðinni í Hörpu;  Kammertónleikum Kirkjubæjarklaustri svo og á Reykholtshátíðinni. Hún lék einleik með Sinfóníuhljómsveit Íslands í júní 2013 og á Menningarnótt í ágúst 2013. Vorið 2014 lék Anna Guðný heildarverk L.van Beethovens fyrir selló og píanó á þrennum tónleikum á Listahátíð Reykjavíkur með Sigurgeiri Agnarssyni sellóleikara, en fyrir þessa tónleika voru þau tilnefnd til Íslensku tónlistarverðlaunanna 2014.

Hún kenndi við tónlistardeild Listaháskóla Íslands frá stofnun hennar 2001 til ársins 2005 þegar hún var fastráðin við Sinfóníuhljómsveit Íslands. Í dag starfar hún einnig sem píanóleikari við Menntaskóla í tónlist (Mít).

Anna Guðný var bæjarlistamaður Mosfellsbæjar árið 2002. Hún hlaut Íslensku tónlistarverðlaunin árið 2009 sem flytjandi ársins.

Netfang: agg@simnet.is
Símanúmer: 566 7581 / 8995123

Til baka í kennarayfirlit